Xəbərlər

05 Jun 2023

Beynəlxalq əməkdaşlıq

TÜRKİYƏLİ ALİMLƏR GEOLOGİYA VƏ GEOFİZİKA İNSTİTUTUNDA OLUBLAR

İstanbul Texniki Universiteti Mədən Yataqları fakültəsi Neft və Təbii Qaz bölümünün professoru Ömər İnanç Türeyen, Mədən Yataqları və Geokimya fakültəsi Mineraloji-Petroqrafik bölümün professoru Emin Çiftçi, Mühəndislik fakültəsinin professoru Erol Kam və digər qonaqlar AR Elm və Təhsil Nazirliyinin Geologiya və Geofizika İnstitutunda olublar.

Geologiya və Geofizika İnstitutunun baş direktoru akademik Akif Əlizadə Elm və Təhsil Nazirliyinin dəvətilə Bakıya gəlmiş alimlərlə görüşərək onlara 1976-cı ildən rəhbəri olduğu elm müəssisəsi, burada aparılan tədqiqatlar, Azərbaycan elminə mühüm töhfələr vermiş alimlər, İnstitutda gənc alimlərin yetişməsi prosesi, elmi nəşrlər, perspektivlər və s. haqqında müfəssəl məlumat verib. Baş direktor həmçinin qonaqları maraqlandıran sualları cavablandırıb. Görüşdə birgə fəaliyyətin mümkünlüyü barədə də müzakirələr aparılıb.

Sonra qonaqlar İnstitutunun laboratoriyalarında elmi tədqiqat işləri, müasir avadanlıq və çihazların iş prinsipi ilə yaxından tanış olublar. Müvafiq şöbə rəhbərləri həmkarlarını aparılan işlər haqqında məlumatlandıraraq onları maraqlandıran sualları cavablandırıblar.

Türkiyəli qonaqlar sonra İnstitutun Geoloji-Mineraloji Muzeyində olublar və xatirə şəkli çəkdiriblər.